Mie Poesie

Vardando ben ’sta teoria, no a ze ‘na novità,
dai timpi dei timpi
el giro dal dito a fato, vien fato,
aéora, desso semo drio doparare, petrolio,
par robe soterae da ere passae,
el carbon, el gas anca queo ze de riciclo.
Alluvion, distrussion, glaciassion, erussion,
vardando ben a natura
‘na pianta nasse, cresse e fa fruti
che i vien magnai dai destinai,
a moéa zo e foje che e fa da còncime par a tera
i fruti magnai dai animai ze a nutrimento par altri
e scorie vien eliminà e nea tera ributà par esser concimà.
Pronte, sempre, par a prossima stajon a rifar vegetassion,
tuto serve al nutrimento,
tuto va al sostentamento,
tuto ritorna dove ga da ritornar
sensa tanto risentimento.

A vita ze bea, bisogna viverla,
profumi, saori, canti, el vento,….
quando tuto no’ vien vissuo
ze za morto rento,….
El soe che scalda,
a luna che sbianca,
el vento che te strassa,
a nibia che te bagne,
e onde che salta,…..
quando tuto questo nol se vede
un ze za ‘ndà … de la.

Fora de qua noaltri se va
i altri, questo, no’ se sa.
Pì de tanto notissie riportae
ze come i pisseghi de sae,
nel paese dea cuccagna
chi laora magna,
chi che varda magna de pì
de leca, de engua, i dise sempre sì,
buratini manovrai
da serti buratinai,
i spaghi i ze massa tirai
ghe vol poco par esser spacai,
vardar su ma anca in zo
parché riva da la, a novità
vista a gravità
de ’sto momento qua….

Gira gira bea Moreta
‘sta sgionfa Nineta,
gira Matona
‘sta Bossa Bufona,
che sensa el segreto
de quel serto …. Buseto
a Bossa Bufona
no’ conta ‘na Mo . a.
Se te capissi quao buso stropare
un regàeo te vien a ciapare,
se el buso ze sbaglià
de regàeo no’ te ciaparà.

Zente desgrassià
daéa vita i ga vudo tuto,
jori i ga perso tuto,
i ze boce vissiai, slevai nea bombana.
Nea vita quando tuto te manca o ze mancà
anca ‘na caressa vien de bon ricordà.
E calde man, de to mare o de to pare
nei cassetti dea memoria
de boto i salta fora,
picoe robe che te scalda el cor.
Cossa i sercava de ricordare
metendo el barbon a scaldare,
jera par far amicissia in maniera nova
o par dir .. tira, inpissa e zoga.