Mie Poesie

In mancomae ze rivà fine ano
che stranessa pensare aéa fine
se dovaria vardar sempre vanti
‘no col paraoci, ma a sento otanta gradi,
al presente del doman primo de ano,
fra poche ore, ano novo vita nova,
mi ghe penso ma me vedo za con un’ano de pì.
Vardar al do e pensar ai sinquanta sette
me va de far schedina par fantasticar
e de saverme gustar l’ano che ga scominsià,
co’ arco e frèce se va a caccia,
no’ soéo … par esser caccià.

“Zio, co’a barba te me sembri Bepi Verdi”
Come ghe somejo?
Mi non son un dei virdi,
parchè i virdi i ze rossi mascherai
i ze ‘ncora crui.
“No “Verdi Bepin” el Mestro”.
Ah queo dei mie franchi,
e mi valgoi tanto cossì poco?
Ti ti ze Mastro de Graspe, de Poesie,
… anca de Vita, el nostro Maestro.

Pendoéoti de giasso daéa gronda,
giossa dopo giossa se giassa
picandose sutio soto  l’altra,
se forma un pendoéoto
sempre pì longo,
sempre pì grosso.
Che beo ze vedare el soe
che’l basa el candeoto de giasso
mie luci spande torno,
pian pianin se desfa
giossa dopo giossa caje zo par tera,
riciapandose a tarda sera.

Gaton selvadego
‘na béessa catarlo davanti,
beo fiero de aspeto regae,
pian pian col passo felpà
desso ze qua
in un salton el se cata la,
un’ocio da gran fein,
‘na peicia veramente de fin,
rece in alto parae
pronte a ogni rumor,
un fiuto insuperabie, 
el me beo vissin da animae…

De caldaìe ghi nè de tante sorte
par alcuni ghe ze tocà anca a morte,
rivederle, rifarle, ritocarle, netarle,
no’ soéo par fora …. ma giustarle,
col gas no se ghe scampa
a volte ze mejo alsar bandiera bianca,
vardando ben ze tuta natura
el soe che te basa ze roba futura.

El Veneto ze come el Ven_to
no’l sta mai fermo un momento,
core dai monti al mare
el se sente supiare,
dai alti monti innevai
l’ocio ciapa immagini … fotografai,
spandendose nea pianura coltivà
dai contadini, ben tegnua e laorà,
se riva a veder el mar
pien de zente intente a pescar,
pì in la el soe nasse
e … a luna cresse ..

Rivà anca st’ano, coe pene in tel core,
massa magoni rento, scurisse anca un fiore.
A zente, stanca de tuto ’sto andasso,
a ze straca e tea vedi, a segna el passo.
Alegresse sempre manco
a me sa che a sia ‘na spina sul fianco.
Alsemo i oci al ceo e metemosse a pregar,
“chi poe darte réta, se fora piove”,
’sta contento e scominsia a fiscìàr.

El formaj ze bon
anca se’l sa da cagnon,
pèna fato o invecià
sora a toéa vien portà,
‘ncora che sgiossa casatea
rento ae strope dea canestrea,
o de forma posà sora toe de arese
da inveciare, posae, in fia de diese,
col pan e vin bon da pasto
o co’a poenta e formaj rosto,
basta che’l sia bon e da ‘na vaca
no che’l sia fato da ‘na machina …  e straca.

Che tempo fa?
Qua za se sa..
un tempo da lupi
coi nuvoi cupi,
ze za tre setimane che piove
su, sora de qua, a ze tuta neve,
semo strachi coi ossi roti
ma righemo driti , non soti.

Tanti picui tochi tacai,
un dopo ‘che altro,
i forma ‘na matassa,
un mestiero singoéo
ma grando …..
pensando al ben che se da.
Con tante picoe giosse, schei,
se poe formar un lago,
penseghe ….
a tuto el ben che podemo
darghe a ‘sti putei,
no’ sentì el core che se strenze
penseghe ….
podarissimo esser stai cossì anca nialtri
o i nostri fiòi …
o i fiòi dei nostri fiòi.